ಕೆಲವೊಮ್ಮೆ ಅನ್ನ ಮಾಡಿದ್ದು ಉಳಿದು ಬಿಡುತ್ತೆ. ಈ ಉಳಿದಿರುವ ಅನ್ನವನ್ನ ಏನು ಮಾಡಬಹುದು ಎನ್ನುವವರು ಅನ್ನದಿಂದ ಮಾಡಿದ ಪಕೋಡನ್ನು ಮಾಡಿ ಉಳಿದ ಅನ್ನವನ್ನ ಸದುಪಯೋಗ ಮಾಡಬಹುದು.
ಅನ್ನದ ಪಕೋಡ ಮಾಡಲು ಬೇಕಾಗುವ ಸಾಮಾಗ್ರಿಗಳು:
- ಅನ್ನ ೨ ಕಪ್
- ಕಡಲೇಹಿಟ್ಟು ಅರ್ಧ ಕಪ್
- ಸಣ್ಣಗೆ ಹೆಚ್ಚಿದ ಈರುಳ್ಳಿ ೨
- ಸಣ್ಣಗೆ ಹೆಚ್ಚಿದ ಹಸಿಮೆಣಸಿನಕಾಯಿ ೪
- ಸಣ್ಣಗೆ ಹೆಚ್ಚಿದ ಶುಂಠಿ ೧ ಚಮಚ
- ಎಣ್ಣೆ ೨ ಕಪ್
- ಚಾಟ್ ಮಸಾಲ ೧ ಚಮಚ
- ಸಣ್ಣಗೆ ಹೆಚ್ಚಿದ ಪುದೀನಾ ಎಲೆಗಳು ಕಾಲು ಕಪ್
- ರುಚಿಗೆ ತಕ್ಕಷ್ಟು ಉಪ್ಪು
ಅನ್ನದ ಪಕೋಡ ಮಾಡುವ ವಿಧಾನ:
ಮೊದಲಿಗೆ ಒಂದು ಪಾನ್ ಗೆ ೨ ಕಪ್ ಎಣ್ಣೆ ಹಾಕಿ ಕಾಯಲು ಬಿಡಬೇಕು.
ನಂತರ ಒಂದು ಬೌಲ್ ತೆಗೆದುಕೊಂಡು ಅದಕ್ಕೆ ಅನ್ನ ೨ ಕಪ್, ಸಣ್ಣಗೆ ಹೆಚ್ಚಿದ ಈರುಳ್ಳಿ ೨, ಸಣ್ಣಗೆ ಹೆಚ್ಚಿದ ಶುಂಠಿ ೧ ಚಮಚ, ಸಣ್ಣಗೆ ಹೆಚ್ಚಿದ ಪುದೀನಾ ಎಲೆಗಳು ಕಾಲು ಕಪ್ , ಸಣ್ಣಗೆ ಹೆಚ್ಚಿದ ಹಸಿಮೆಣಸಿನಕಾಯಿ ೪ ಹಾಕಿ ಕಲಸಿದ ನಂತರ ಈ ಮಿಶ್ರಣಕ್ಕೆ ಕಡಲೇ ಹಿಟ್ಟು ಅರ್ಧ ಕಪ್, ಚಾಟ್ ಮಸಾಲ ೧ ಚಮಚ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಚೆನ್ನಾಗಿ ಕಲಸಿಟ್ಟುಕೊಳ್ಳಿ.
ಎಣ್ಣೆ ಕಾದ ನಂತರ ಈಗಾಗಲೇ ಮಾಡಿಟ್ಟುಕೊಂಡಿರುವ ಮಿಶ್ರಣವನ್ನು ಸಣ್ಣ ಸಣ್ಣ ಉಂಡೆಗಳನ್ನಾಗಿ ಮಾಡಿಕೊಂಡು ಕಾದ ಎಣ್ಣೆಯಲ್ಲಿ ಬಿಡಿ. ಈ ಉಂಡೆಗಳು ಚಿನ್ನದ ಬಣ್ಣಕ್ಕೆ ಬರುವವರೆಗೂ ಎಣ್ಣೆಯಲ್ಲಿ ಡೀಪ್ ಫ್ರೈ ಮಾಡಿದರೆ ಅನ್ನದ ಪಕೋಡ ಸವಿಯಲು ಸಿದ್ಧ.
