ಉಡುಪಿ: ಒಎಲ್ ಎಕ್ಸ್ ನಲ್ಲಿ ಕಿವಿಯೋಲೆ ಮಾರಲು ಹೋಗಿ ಯುವತಿಯೊಬ್ಬರು 93 ಸಾವಿರ ಹಣ ಕಳೆದುಕೊಂಡಿದ್ದಾರೆ. ಈ ಕುರಿತು ಸೆನ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಒಎಲ್ ಎಕ್ಸ್ ನಲ್ಲಿ ಕಿವಿಯೋಲೆ ಮಾರುವ ಜಾಹಿರಾತನ್ನು ಮಣಿಪಾಲದ, ಸೊನಿಯಾ ಹಾಸ್ಟೆಲ್ ನ ನಿವಾಸಿಯಾದ ಖುಷಿ ನೀಡಿದ್ದರು. ಕಿವಿಯೋಲೆ ಖರೀದಿಸುವುದಾಗಿ ಅಪರಿಚಿತ ವ್ಯಕ್ತಿಯೊಬ್ಬ ಇವರಿಗೆ ಕರೆ ಮಾಡಿದ್ದಾನೆ. ಮೊದಲಿಗೆ ಪೇಟಿ ಎಂ ಮೂಲಕ ಯುವತಿಗೆ 100 ರೂ. ಪಾವತಿಸಿದ್ದಾನೆ. ನಂತರ 19,018 ರೂ. ಯುವತಿಯ ಖಾತೆಯಿಂದ ಕಡಿತಗೊಂಡಿದೆ. ಯುವತಿ ಈ ಕುರಿತು ಆ ವ್ಯಕ್ತಿಗೆ ಕರೆ ಮಾಡಿ ವಿಚಾರಿಸಿದಾಗ ಹಣವನ್ನು ಮರುಪಾವತಿ ಮಾಡುವುದಾಗಿಯೂ, ಹಣ ಪಾವತಿಸಲು ಬೇರೆ ಯಾವುದಾದರೂ ಖಾತೆಯ ಮಾಹಿತಿಯನ್ನು ಒದಗಿಸುವಂತೆಯೂ ಹೇಳಿ ನಂಬಿಸಿದ್ದಾನೆ.
ಯುವತಿ ಆತನ ಮಾತನ್ನು ನಂಬಿ ತನ್ನ ಸ್ನೇಹಿತೆ ಸಾಯಿ ಚಂದನ್ ಎಂಬುವವರ ಮೊಬೈಲ್ ನಂಬರ್ ನೀಡಿದ್ದಾರೆ. ನಂತರ ಆ ಮೊಬೈಲ್ ನಂಬರ್ ಗೆ ಬಂದ ಓಟಿಪಿ ವಿವರವನ್ನು ಕೇಳಿದ್ದಾನೆ. ನಂತರ ಸ್ನೇಹಿತೆಯ ಖಾತೆಯಿಂದಲೂ 74,800 ರೂ. ಹಂತ ಹಂತವಾಗಿ ಕಡಿತಗೊಂಡಿದೆ. ಕಿವಿಯೋಲೆ ಮಾರಲು ಹೋಗಿ ಒಟ್ಟು 93,818 ರೂ ಕಳೆದುಕೊಂಡಿದ್ದಾರೆ.
