ಸ್ವೀಡನ್: ಇಲ್ಲಿಯ ನಗರಗಳಲ್ಲಿ ದಿನದಿಂದ ದಿನಕ್ಕೆ ಬೀದಿಯಲ್ಲಿ ಬೀಳುವ ಸಿಗರೇಟ್ ಚೂರುಗಳ ಪ್ರಮಾಣ ಹೆಚ್ಚಾಗುತ್ತಿದ್ದು, ಇದರಿಂದ ಮಣ್ಣಿನ ಮಾಲಿನ್ಯವನ್ನು ಉಂಟಾಗುತ್ತಿದೆ. ಈ ಸಮಸ್ಯೆಯನ್ನು ನಿವಾರಣೆ ಮಾಡುವ ಸಲುವಾಗಿ ಸ್ವೀಡನ್ ನ ಸ್ಟಾರ್ಟ್ ಅಪ್ ಕಂಪನಿಯೊಂದು ಕಾಗೆಗಳಿಗೆ ಸಿಗರೇಟ್ ಚೂರುಗಳನ್ನು ಹೆಕ್ಕಿ ತರುವ ತರಬೇತಿಯನ್ನು ನೀಡಲು ಮುಂದಾಗಿದೆ.
ಪ್ರತಿ ಬಾರಿ ಕಾಗೆಗಳು ಸಿಗರೇಟ್ ಚೂರುಗಳನ್ನು ಮಷಿನ್ನೊಳಗೆ ಹಾಕುವಾಗ ಆಹಾರವನ್ನು ಪಡೆಯುತ್ತದೆ. ಕೋರ್ವಿಡ್ ಕ್ಲೀನಿಂಗ್ ಎಂಬ ಸಂಸ್ಥೆ ಈ ಸಾಹಸಕ್ಕೆ ಮುಂದಾಗಿದ್ದು, ಸಿಗರೇಟ್ ಚೂರುಗಳನ್ನು ಸಂಗ್ರಹಿಸಲು ಹಾಗೂ ಪ್ರತೀ ಸಿಗರೇಟ್ ಬಡ್ ಪತ್ತೆಗೆ 16 ರೂಪಾಯಿ ಖರ್ಚಾಗುತ್ತದೆ. ಅದೇ ಕಾಗೆಗಳಿಗೆ ತರಬೇತಿ ನೀಡಿ ಈ ಕಾರ್ಯಕ್ಕೆ ಬಳಸಿಕೊಂಡರೆ ಖರ್ಚು ಕಡಿಮೆಯಾಗುತ್ತದೆ ಎನ್ನುವುದು ಸಂಸ್ಥೆಯ ಸ್ಥಾಪಕರಾದ ಗುಂಥರ್ ಅನ್ಸೇನ್ ಅಭಿಪ್ರಾಯ.
ಕಾಗೆಗಳಿಗೆ ತರಬೇತಿ ನೀಡುವುದು ಸುಲಭದ ಕೆಲಸ. 7 ರಿಂದ 10 ವರ್ಷದ ಮಕ್ಕಳಲ್ಲಿ ಇರುವ ಬುದ್ಧಿವಂತಿಕೆ ಕಾಗೆಗಳಲ್ಲಿ ಕಂಡುಬರುತ್ತದೆ. ಆದ್ದರಿಂದ ನಗರಗಳನ್ನು ಸ್ವಚ್ಛಗೊಳಿಸಲು ಕಾಗೆಗಳನ್ನು ಆಯ್ಕೆ ಮಾಡಲಾಗಿದೆ ಎಂದು ಗುಂಥರ್ ಅನ್ಸೇನ್ ತಿಳಿಸಿದ್ದಾರೆ.
