ಬೆಂಗಳೂರು: ಸುಮಾರು ವರ್ಷಗಳ ಹಿಂದೆ ಡಬಲ್ ಡೆಕ್ಕರ್ ಬಸ್ ಗಳು ನಗರಗಳ ಪ್ರಮುಖ ಆಕರ್ಷಣೆಯಾಗಿತ್ತು. ಬರುಬರುತ್ತಾ ಈ ಬಸ್ ಗಳು ಕಣ್ಮರೆಯಾದವು. ನಮ್ಮ ಹಿರಿಯರು ಈಗಲೂ ಡಬಲ್ ಡೆಕ್ಕರ್ ಬಸ್ ಗಳಲ್ಲಿ ಸಂಚರಿಸುತ್ತಿದ್ದುದನ್ನು ನೆನಪಿಸಿಕೊಳ್ಳುತ್ತಾರೆ. ಇದೀಗ ಬೆಂಗಳೂರು ನಗರಗಳಲ್ಲಿ ಬಿಎಂಟಿಸಿ ಸಂಸ್ಥೆಯು ಡಬಲ್ ಡೆಕ್ಕರ್ ಬಸ್ ಗಳನ್ನು ಮತ್ತೆ ರೋಡಿಗಿಳಿಸಲು ತೀರ್ಮಾನಿಸಿದೆ.
ಈ ಬಾರಿ ಡೀಸಲ್ ಆಧಾರಿತ ಬಸ್ ಗಳ ಬದಲಿಗೆ ಎಲೆಕ್ಟ್ರಿಕ್ ಬಸ್ ಗಳು ಸಂಚರಿಸುತ್ತವೆ ಎನ್ನುವುದು ವಿಶೇಷ. ನಗರದೊಳಗಿನ ರಸ್ತೆಗಳು ಸಣ್ಣದಾಗಿರುವುದರಿಂದ ಡಬಲ್ ಡೆಕ್ಕರ್ ಬಸ್ ಗಳು ಸಂಚಾರಕ್ಕೆ ಕಷ್ಟವಾಗುತ್ತದೆ. ಆದ್ದರಿಂದ ನಗರದ ಹೊರವಲಯದ ರಸ್ತೆಗಳಲ್ಲಿ ಈ ಬಸ್ ಗಳ ಸಂಚಾರ ಆರಂಭಿಸಲಾಗುತ್ತದೆ. ಮೊದಲ ಹಂತದಲ್ಲಿ 5 ಬಸ್ ಗಳನ್ನು ಖರೀದಿಸಿ, ಬಸ್ ಗಳ ಸೇವೆ ತೃಪ್ತಿನೀಡಿದಲ್ಲಿ ಹೆಚ್ಚಿನ ಬಸ್ ಗಳನ್ನು ಖರೀದಿಸಲಾಗುತ್ತದೆ ಎಂದು ಬಿಎಂಟಿಸಿ ಮೂಲಗಳು ತಿಳಿಸಿವೆ.
