ಮಂಗಳೂರು: ಅಪರೂಪದ ಎರಡು ಫ್ಲೆಯಿಂಗ್ ಫಿಶ್ ಗಳು ಮಂಗಳೂರಿನ ಮೀನುಗಾರರ ಬಲೆಗೆ ಬಿದ್ದಿವೆ.
ಫ್ಲೆಯಿಂಗ್ ಫಿಶ್ ಗಳು ಎರಡು ದಿನಗಳ ಹಿಂದೆ ದಡಕ್ಕೆ ಬಂದಿದ್ದ ಮೀನಿನ ರಾಶಿಯಲ್ಲಿ ಸಿಕ್ಕಿವೆ. ಸಾಮಾನ್ಯವಾಗಿ 15 ರಿಂದ 45 ಸೆಂ.ಮೀ ಬೆಳೆಯುವ ಈ ಮೀನುಗಳು ಬಲೆಗೆ ಬೀಳುವುದು ಅಪರೂಪ. ಬೇರೆ ಮೀನುಗಳಿಗೆ ಹೋಲಿಸಿದರೆ ಫ್ಲೆಯಿಂಗ್ ಫಿಶ್ ಗಳು ಹೆಚ್ಚು ರುಚಿಕರವಾಗಿರುತ್ತದೆ. ಆದರೆ ಅದನ್ನು ಈ ಭಾಗದಲ್ಲಿ ಹಿಡಿಯುವುದು ಕಡಿಮೆ ಎಂದು ಮೀನುಗಾರರೊಬ್ಬರು ತಿಳಿಸಿದ್ದಾರೆ.
ಫ್ಲೆಯಿಂಗ್ ಫಿಶ್ ಗೆ ತುಳುವಿನಲ್ಲಿ ಪಕ್ಕಿಮೀನ್ ಎನ್ನುತ್ತಾರೆ. ಈ ಮೀನುಗಳು ಹೆಚ್ಚಾಗಿ ಸಮುದ್ರದ ಆಳದಲ್ಲಿ ಇರುವಂತಹ ಮತ್ಸ್ಯ ಪ್ರಭೇದವಾಗಿದ್ದು, ಇವುಗಳಿಗೆ ಹಕ್ಕಿಯಂತೆ ರೆಕ್ಕೆಗಳಿರುತ್ತವೆ. ಈ ಮೀನುಗಳು ರೆಕ್ಕೆ ಹಾಗೂ ದೇಹದ ಎಲುಬುಗಳ ವಿಭಿನ್ನ ರಚನೆಯಿಂದ ನೀರಿನ ಮೇಲೆ ಎಗರಿ ಕೆಲ ಸಮಯ ಹಕ್ಕಿಗಳಂತೆ ಹಾರುವ ಸಾಮರ್ಥ್ಯ ಹೊಂದಿದೆ.
